“Үндэсний хөгжлийн хүрээлэн” УТҮГ-ЫН ЗАХИРЛЫН СОНГОН ШАЛГАРУУЛАЛТЫН ЗАР

Монгол Улсын яамны эрх зүйн байдлын тухай хуулийн 9 дүгээр зүйлийн 9.8, Хөгжлийн бодлого, төлөвлөлт, түүний удирдлагын тухай хуулийн 7 дугаар зүйлийн 7.3, Төрийн хэмнэлтийн тухай хуулийн 20 дугаар зүйлийн 20.2, Засгийн газрын 2023 оны 86 дугаар тогтоолын хавсралтаар батлагдсан “Төрийн өмчийн хуулийн этгээдийн ажлын байрны сул орон тоонд нээлттэй сонгон шалгаруулалт явуулах нийтлэг журам”, Засгийн газрын 2024 оны 22 дугаар тогтоол, Эдийн засаг, хөгжлийн яамны төрийн нарын бичгийн даргын 2024 оны “Ажлын хэсэг байгуулах тухай” A/221 дугаар тушаалыг тус тус үндэслэн “Үндэсний хөгжлийн хүрээлэн” улсын төсөвт үйлдвэрийн газрын захирлын албан тушаалын сонгон шалгаруулалтыг зарлаж байна.

Нэг. Албан тушаалд тавигдах шаардлага

1.1 Нийтлэг шаардлага:

• Монгол Улсын иргэн байх;
• Эрүүгийн хуульд заасан авлига, албан тушаалын гэмт хэрэг үйлдэж шүүхээр ял шийтгүүлж байгаагүй байх;
• Сэтгэцийн өвчин, эмгэггүй байх;
• Боловсролын бакалавр ба түүнээс дээш зэрэгтэй байх;
• Албан тушаалын тодорхойлолтод заасан шаардлагыг бүрэн хангасан байх;
• Төрийн алба хаах насны дээд хязгаарт хүрээгүй байх;
• Хуулийн дагуу цэргийн жинхэнэ алба хаах үүрэг хүлээсэн иргэн үүргээ биелүүлсэн байх.

1.2 Тусгай шаардлага:

1.2.1. Тухайн нэр дэвшигч нь “Үндэсний хөгжлийн хүрээлэн” Улсын төсөвт үйлдвэрийн газрын захирал байхад ашиг сонирхол үүсгэхгүй байх.

1.2.2. Нэр дэвшигч нь хөгжлийн бодлого, төлөвлөлт болон судалгаа, шинжилгээний чиглэлээр ажиллаж байсан туршлагатай байх

1.2.3. Англи хэлний ахисан түвшний мэдлэг эзэмшсэн байх.

Хоёр. Бүрдүүлэх бичиг баримт

2.1. Сонгон шалгаруулалтад оролцох тухай нэр дэвшигчийн хүсэлт (сонгон шалгаруулалтад оролцох хүсэлтээ тодорхой бичих);

2.2. Анкет (төрийн албан хаагчийн анкетыг бүрэн бөглөх, 4х6 хэмжээтэй цээж зураг заавал наасан байх);

2.3. Ажил байдлын тодорхойлолт (ажил эрхэлдэг иргэн байгууллагаасаа тодорхойлолт авах, ажил эрхэлдэггүй иргэн өөрийн хийж гүйцэтгэсэн ажлын талаарх мэдээлэл);

2.4. Нийгмийн даатгал төлсөн талаарх тодорхойлолт /E-Mongolia цахим хуудаснаас татан авах/;

2.5. Боловсролын түвшнийг тодорхойлсон баримт бичиг /диплом/, хэрэв гадаад улсад их, дээд сургууль төгссөн бол боловсролын баримт бичгийн баталгаат орчуулгыг болон бусад сургалт, семинарт хамрагдсан гэрчилгээ, сертификатын хуулбар;

2.6. Иргэний үнэмлэхийн хуулбар;

2.7. Иргэний, эрүүгийн хариуцлага хүлээж байсан эсэх тухай тодорхойлолт /E-Mongolia цахим хуудаснаас татан авах/;

2.8. Сэтгэцийн өвчин, эмгэггүй тухай тодорхойлолт;

2.9. Нэр дэвшигчийн зүгээс “Үндэсний хөгжлийн хүрээлэн” Улсын төсөвт үйлдвэрийн газрыг урт, дунд хугацаанд хөгжүүлэх төлөвлөгөө, зорилго, зорилтын талаарх 2000-с доошгүй үгтэй танилцуулга бичиж ирүүлнэ. Танилцуулах илтгэлийн цахим PPT хувийг энэхүү удирдамжид заагдсан цахим шуудангийн хаягаар урьдчилан ирүүлсэн байна.

Гурав. Сонгон шалгаруулалт

3.1. Сонгон шалгаруулалтын материал хүлээн авах хугацаа дууссаны дараа ажлын 2 хоногийн дотор сонгон шалгаруулалтын зохион байгуулах ажлын хэсэг сонгон шалгаруулалтад оролцохоор материалаа ирүүлсэн нэр дэвшигчдийн материалыг хянан үзэж, бичиг баримтын бүрдэл “Үндэсний хөгжлийн хүрээлэн” Улсын төсөвт үйлдвэрийн газрын захирлын албан тушаалд тавигдах нийтлэг болон тусгай шаардлагыг хангаж байгаа эсэх талаар хянан үзэж, дүгнэлт гаргана.

3.2. Бичиг баримтын бүрдэл, “Үндэсний хөгжлийн хүрээлэн” Улсын төсөвт үйлдвэрийн газрын захирлын албан тушаалд тавигдах нийтлэг болон тусгай шаардлагыг хангаагүй, тестийн босго оноо хүрээгүй оролцогчдод үндэслэл, тайлбар бүхий хариу өгнө.

3.3. Сонгон шалгаруулалтын шаардлага хангасан оролцогчидтой “Үндэсний хөгжлийн хүрээлэн” Улсын төсөвт үйлдвэрийн газрын захирлыг сонгон шалгаруулах үүрэг бүхий ажлын хэсгээс холбоо барьж, шалгалтын авах өдөр, цаг болон  байрлалыг мэдэгдэнэ.

3.4. Сонгон шалгаруулалтын зохион байгуулах үүрэг бүхий ажлын хэсгээс бичиг баримтын бүрдэл, “Үндэсний хөгжлийн хүрээлэн” Улсын төсөвт үйлдвэрийн газрын захирлын албан тушаалд тавигдах нийтлэг болон тусгай шаардлага хангасан нэр дэвшигчдийг хүлээн авч, шалгалтын ажлыг танхимаар зохион байгуулна. Шалгалт нь 2 үе хэсгээс бүрдэнэ.

3.5. Сонгон шалгаруулах ажлын хэсэг шалгаруулалтын хүрээнд уншиж судлах эрх зүйн баримт бичгийн жагсаалт, сорилгын загварыг боловсруулан, доорх хүснэгтэд заасан агуулгын хүрээнд тестийн шалгалт зохион байгуулна.

3.6. Тестийн шалгалтын босго онооны үнэлгээг хангасан оролцогчдоос доорх хүснэгтэд заасан агуулгын хүрээнд ярилцлага хийж, асуулт асууж үнэлгээ өгнө.

3.7. Тестийн шалгалтын оноо болон ярилцлагын үнэлгээний онооны нийлбэр дүнгээр 60-аас дээш хамгийн өндөр үнэлгээ авсан нэг нэр дэвшигчийг сонгон шалгаруулж, санал, дүгнэлтийг ажлын 5 хоногт багтаан Эдийн засаг, хөгжлийн яамны Төрийн нарийн бичгийн даргад хүргүүлнэ. Шалгараагүй оролцогчдод үндэслэл, тайлбар бүхий хариу өгнө.

Дөрөв. Сонгон шалгаруулалтын материал хүлээн авах хугацаа, хаяг

Сонгон шалгаруулалтад орох иргэний материалыг 2024 оны 10 дугаар сарын 07-ны өдрийн 17:30 цаг хүртэл хугацаанд gandi.m@med.gov.mn цахим хаягаар болон бичгээр битүүмжилснийг тус тус хүлээн авна.

Анхаарах зүйлс:

1. Хугацаа хоцорсон материалыг хүлээн авахаас татгалзана.

2. Нэр дэвшигчийн материалыг цахимаар авахаас гадна цаасаар 1 хувь хэвлэн дугтуйнд хийж битүүмжлэн, Эдийн засаг, хөгжлийн яамны 603 тоот өрөөнд дээрх хугацаанд багтаан ирүүлэхийг анхаарна уу.

3. Нэмэлт мэдээллийг 51-261540 дугаарын утаснаас авна уу.

СОНГОН ШАЛГАРУУЛАЛТЫГ ЗОХИОН БАЙГУУЛАХ АЖЛЫН ХЭСЭГ