Уулзалтаар Монгол Улсын Тэргүүн Шадар сайд бөгөөд Эдийн засаг, хөгжлийн сайд Л.Гантөмөр Бүгд Найрамдах Хятад Ард Улс (БНХАУ)-ын Хайнан мужийн Боао хотноо 2025 оны 3 дугаар сарын 25-28-ний өдрүүдэд зохион байгуулагдах “Азийн төлөөх Боаогийн чуулга уулзалт”-д оролцохоо илэрхийллээ. Тус уулзалт нь энэ удаад “Хувьсан өөрчлөгдөж буй дэлхий нийтийн харилцаанд итгэлцлийг бэхжүүлж хамтын ажиллагааг дэмжих” сэдвийн хүрээнд зохион байгуулагдах бөгөөд дэлхийн эдийн засгийн хөгжил, хамтын ажиллагааг дэмжих ач холбогдолтой байна.
Түүнчлэн уулзалтаар Монгол, Хятадын Засгийн газар хоорондын комисс (ЗГХК)-ын хурлыг 2025 онд Монголын тал хариуцан Монгол Улсад зохион байгуулж байгааг онцолж, энэ үрээнд Хөшгийн хөндийд байрлах “Хүннү хот”-д шинжлэх ухааны парк байгуулах, Монгол-Орос-Хятадын Эдийн засгийн коридор байгуулах хүрээнд хэрэгжүүлэх 35 төсөл арга хэмжээг тохиролцох, хоёр улсын худалдаа, эдийн засгийн хамтын ажиллагааг бэхжүүлэх хүрээнд боомтын тээврийн гарцыг нэмэгдүүлэх, эрчим хүч, хөдөө аж ахуй, нүүрсний экспортын хэмжээг нэмэгдүүлэхэд хоёр тал анхаарч нягт хамтран ажиллах талаар санал солилцлоо.
