Эдийн засаг, хөгжлийн яамнаас Монгол Улсын Тэргүүн шадар сайд бөгөөд Эдийн засаг, хөгжлийн сайдын 2025 оны 07 дугаар сарын 28-ны өдөр баталсан А/13 тоот тушаалаар “Монгол улсыг болон аймаг, нийслэл, хотыг хөгжүүлэх таван жилийн үндсэн чиглэл боловсруулах аргачлал”-ыг танилцуулах, мэргэжил арга зүйн зөвлөгөө өгөх сургалт, хэлэлцүүлгийг үе шаттай зохион байгуулж байна.
Сургалт, хэлэлцүүлгийг Эдийн засаг, хөгжлийн яам, түүний харьяа байгууллагуудын албан хаагчдад, мөн 2025 оны 08 дугаар сарын 05-нд Улсын Их Хурлын харьяа байгууллагууд болон төрийн захиргааны төв байгууллагуудын албан хаагчдыг хамруулан зохион байгууллаа.
Монгол Улсыг хөгжүүлэх таван жилийн үндсэн чиглэл нь улсын хөгжлийн тэргүүлэх чиглэл, зорилтыг нэгдсэн байдлаар тодорхойлж, төсөв, хөрөнгө оруулалт, салбарын бодлого хоорондын уялдааг хангах зорилготой дунд хугацааны хөгжлийн бодлогын баримт бичиг юм. Монгол Улсыг 2021-2025 онд хөгжүүлэх таван жилийн үндсэн чиглэл хэрэгжих хугацаа 2025 оны 12 дугаар сарын 31-ний өдрөөр дуусгавар болж байгаа бөгөөд Монгол Улсыг 2026-2030 онд хөгжүүлэх таван жилийн үндсэн чиглэл боловсруулах ажил явагдаж байна.
Цаашид уг сургалт, хэлэлцүүлгийг 21 аймаг, нийслэл Улаанбаатар хотын хөгжлийн бодлого, төлөвлөлт хариуцсан албан хаагчдад зориулж үргэлжлүүлэн зохион байгуулахаар төлөвлөн ажиллаж байна.
